Zola tekur við Watford

Giampaolo Pozzo, nýr eigandi enska B-deildarliðsins Watford, segir að munnlegt samkomulag sé um að Gianfranco Zola muni taka að sér starf knattspyrnustjóra hjá félaginu.

Pozzo gekk frá kaupum á Watford í síðustu viku og strax þá fóru orðrómar á kreik um að Zola myndi taka við sem knattspyrnustjóri liðsins af Sean Dyche.

„Þetta er allt á réttri leið og ég hef trú á því að hann verði okkar nýi þjálfari. Það er munnlegt samkomulag í höfn," sagði Pozzo í samtali við ítalska fjölmiðla.

„Enskir þjálfarar eru ólíkir ítölskum þjálfurum. Við þurftum samt tíma til að ákveða okkur," sagði Pozzo sem er einig eigandi Udinese á Ítalíu og Granda á Spáni.

„Við erum að reyna að koma þessu sögufræga félagi aftur á sinn stall og aftur í ensku úrvalsdeildina."