Eigandi Shanghai Shenhua staðfestir komu Drogba

Didier Drogba, fyrrum framherji Chelsea, hefur gert samkomulag um að ganga til liðs við kínverska félagið Shanghai Shenhua. Þetta staðfestir eigandi félagsins við þarlenda fjölmiðla.

Zhu Jun, eigandi félagsins, sótti Fílabeinsströndina heim í síðustu viku en þangað á Drogba ættir sínar að rekja. Hann staðfesti í samtali við Xinhua fréttastofuna að Drogba myndi ganga til liðs við félagið. Þó vildi hann ekki gefa neitt upp um tímasetningu á komu Drogba eða hvers virði samningur hans væri.

Kínverska félagið ætlar sér stóra hluti en á dögunum réð það Argentínumanninn Sergio Batista sem knattspyrnustjóra félagsins. Batista, sem áður stýrði meðal annars landsliði þjóðar sinnar, verður ekki í vandræðum með að stilla upp sterku framherjapari en Nicolas Anelka leikur sem kunnugt er með félaginu.

Drogba, sem er 34 ára, staðfesti fyrir nokkrum vikum brottför sína frá Chelsea eftir að hann tryggði liði sínu langþráðan sigur í Meistaradeild Evrópu. Þá skoraði hann bæði mark liðsins í venjulegum leiktíma og úr síðustu spyrnu liðsins í vítaspyrnukeppninni.