Lewandowski vill ekkert tala um Manchester United

Robert Lewandowski, framherji pólska landsliðsins, neitaði að svara spurningum blaðamanna um Manchester United eftir leik Pólverja og Grikkja á EM í fótbolta í gær. Lewandowski skoraði fyrsta mark EM í ár en hann hefur verið margoft orðaður við enska stórliðið.

Franciszek Smuda, þjálfari pólska landsliðsins, gaf það út fyrir leikinn að Lewandowski myndi spila með Manchester United á næsta tímabili en þessi 23 ára framherji hefur farið á kostum með þýska liðinu Borussia Dortmund.

„Ég ætla ekki að einbeita mér að þessu máli núna. EM 2012 er í algjörum forgangi hjá mér," sagði Robert Lewandowski en það er vitað að fulltrúar Manchester United fylgdust nokkrum sinnum með honum á síðasta tímabili.

Lewandowski skoraði laglegt skallamark en fékk auk þess nokkur góð færi til viðbótar. „Ég sé eftir því að hafa ekki nýtt fleiri færi í fyrri hálfleiknum. Ég hefði getað skorað tvö eða þrjú til viðbótar en ég ætla samt að vera jákvæður áfram. Það munaði samt bara einu sinni nokkrum millimetrum en ég skora vonandi úr næsta færi," sagði Lewandowski.

Sir Alex Ferguson, stjóri United, var á vellinum þegar Lewandowski skoraði þrennu í 5-2 sigri Dortmund á Bayern München í þýska bikarúrslitaleiknum. Lewandowski skoraði alls 22 mörk í þýsku úrvalsdeildinni en hann á tvö ár eftir af samningi sínum við Dortmund-liðið.