Kári fer frá Aberdeen í sumar

Craig Brown, knattspyrnustjóri skoska úrvalsdeildarfélagsins Aberdeen, hefur staðfest að Kári Árnason muni fara frá félaginu nú í sumar.

Kári átti gott tímabil með Aberdeen en samningar tókust ekki á milli hans og félagsins fyrr á tímabilinu þegar viðræður voru í gangi í janúar. Brown sagði að Kári þyrfti að slá af launakröfum sínum.

Kári var svo orðaður við lið í Englandi og Frakklandi en þrátt fyrir það gaf Kári í skyn í viðtölum undir lok tímabilsins að hann væri ánægður hjá Aberdeen og reiðubúinn að vera áfram.

En nú hefur Brown staðfest að hann hafi gert aðrar áætlanir fyrir sína miðvallarleikmenn og því muni Kári fara frá félaginu í sumar.

„Við neyddumst til að gera aðrar áætlanir þegar hann hafnaði tilboði okkar fyrir nokkrum mánuðum síðan," sagði Brown. „Gavin Rae og Stephen Hughes framlengdu samninga sína og því finnst mér við vera vel settir á miðri miðjunni."

Kári hélt utan í atvinnumennsku árið 2004 og hefur síðan þá spilað með Djurgården í Svíþjóð, AGF og Esbjerg í Danmörku, Plymouth í Englandi og nú síðast Aberdeen. Hann er 29 ára gamall og á átján landsleiki að baki. Síðast spilaði hann með landsliðinu í vináttulandsleik gegn Svartfjallalandi í lok febrúar.