Hulk spenntur fyrir Chelsea

Umboðsmaður brasilíska sóknarmannsins Hulk segir að hann muni hefja viðræður við Chelsea um möguleg vistaskipti kappans nú í sumar.

Hulk er 25 ára og á mála hjá Porto í Portúgal. Hann hefur lengi verið orðaður við Chelsea og urðu þær raddir enn háværari eftir að greint var frá því að Didier Drogba færi frá Chelsea í sumar.

Umboðsmaður hans, Teodoro Fonseca, var á úrslitaleik Meistaradeildar Evrópu á dögunum og átti þá von á því að hann myndi hefja viðræður við Chelsea innan skamms.

„Áhuginn er til staðar en það er þó ekkert fast í hendi. Hulk er hrifinn af ensku úrvaldeildinni og Chelsea er góður kostur fyrir hann," sagði Fonseca.