Kostar 2,2 milljarða króna að reka Barton

Vandræðapésinn Joey Barton var í gær dæmdur í 12 leikja bann fyrir rauða spjaldið þegar Manchester City tryggði sér Englandsmeistaratitilinn. Ef hann hefði látið vera að sparka í Sergio Aguero og reyna að skalla Vincent Kompany hefði hann sloppið með fjögurra leikja bann. 

Lið hans, QPR, er í mikilli klípu.  Margir vilja að Barton verði rekinn en þá vandast málið.  Hann á eftir þrjú ár af samningi sínum við QPR og samkvæmt frétt í Evening Standard gæti félagið þurft að borga upp samninginn, tæplega 11 milljónir punda. 

Þrátt fyrir brjálæðiskast Bartons í leiknum umrædda þá rauf hann ekki samninginn við félagið.  Vegna langs keppnisbanns verður Barton ekki í 25 manna hópnum sem QPR þarf að tilkynna áður en leiktíðin byrjar í ágúst.

Nokkuð ljóst þykir að QPR getur ekki selt hann því hann má ekki spila fyrr en í nóvemer.  Lundúnaliðið þarf að skoða agamálin því félagið fékk 9 rauð spjöld á leiktíðinni, flest allra liða í deildinni. 

Barton karlinn krækti í 10 gul spjöld og varð auðvitað efstur á afbrotaskrá QPR.