Ruddy missir af EM vegna fingurbrots | Táningur í hans stað

John Ruddy, markvörður Norwich, braut á sér fingur á æfingu með enska landsliðinu í gær. Hann hefur verið útilokaður frá þátttöku á Evrópumótinu í knattspyrnu. Jack Butland tekur stöðu Ruddy í landsliðshópnum.

Ruddy þótti standa sig afar vel í spútnikliði Norwich í ensku úrvalsdeildinni á nýyfirstaðinni leiktíð. Hann mun ferðast með landsliði Englands sem mætir Noregi í æfingaleik í Osló á laugardag og fylgjast með leiknum úr stúkunni.

Jack Butland, sá sem tekur sæti Ruddy í landsliðshópnum, er aðeins 19 ára gamall. Hann er á mála hjá Birmingham en hefur þó enn ekki spilað fyrir aðalliðið. Butland var í láni hjá D-deildarliði Cheltenham á síðustu leiktíð þar sem hann hélt hreinu í ellefu leikjum af 24.

Brúðkaupið framundan

Það kom Ruddy töluvert á óvart að vera valinn einn af þremur landsliðsmarkvörðum Englands fyrir mótið. Hann hafði meðal annars skipulagt brúðkaup sitt snemma í júní auk þess sem fyrirhuguð var steggjun í Portúgal.

Ruddy hafði samið um það við forráðamenn landsliðsins að hann fengi frí til að ganga í það heilaga en sama daga leika Englendingar æfingaleik við Belgíu.

Steggjunina, þar sem Ruddy ætlaði að spila golf með félögum sínum í Portúgal, þurfti þó að fella niður. Nú er ljóst að Ruddy betur alfarið einbeitt sér að brúðkaupsundirbúningnum.