Sol Campbell ráðleggur stuðningsmönnum Englands að vera heima

Keppni á Evrópumeistaramótinu í knattspyrnu hefst eftir 11 daga en keppnin fer fram að þessu sinni í Póllandi og Úkraínu. Margir hafa áhyggjur af hvernig tekið verður á móti áhorfendum í þessum löndum og hafa fjölskyldur tveggja enskra landsliðsmanna ákveðið að verða eftir á Englandi vegna fjölmargra mála sem komið hafa upp í tengslum við kynþáttaníð í Úkraínu og Póllandi.

Sol Campbell, fyrrum landsliðsmaður Englands, ráðleggur enskum stuðningsmönnum að ferðast ekki á EM að þessu sinni.

Fjölskyldur Theo Walcott og Alex Oxlade-Chamberlain, leikmanna Arsenal, ætla að verða eftir á Englandi. Ástæðan er ótti þeirra við atvik sem gætu komið upp sem tengjast kynþáttafordómum.

Campbell er á þeirri skoðun að UEFA hafi gert mistök með því að velja Pólland og Úkraínu í þetta verkefni. „Þeir gerðu mistök," segir hinn 37 ára gamli Campbell í þættinum Panorama sem sýndur var á BBC. Í þættinum voru atvik sýnd frá fótboltavöllum í Úkraínu þar sem að ráðist var á áhorfendur af asískum uppruna, fjöldi áhorfenda heilsaði að hætti nasista, og kynþáttaníð í garð hörundsdökkra leikmanna var mjög áberandi.

„Þetta eru mistök. UEFA átti að gera þá kröfu að vandamálin yrðu leyst áður en þessi lönd gætu fengið keppnina. Það eru gerðar of litlar kröfur til þeirra landa sem fá að halda þessa frábæru keppni," segir Campbell m.a. í þættinum.

UEFA hefur sagt að vandmálin sem tengjast þessum löndum séu á ábyrgð knattspyrnusambanda viðkomandi landa.

Campbell ráðleggur stuðningsmönnum enska landsliðsins að fara ekki á EM í sumar.

„Verið heima hjá ykkur og horfið á keppnina í sjónvarpi. Ekki taka áhættuna því þið gætuð komið heim í kistu," sagði Campbell m.a. í þættinum.