Michael Owen fær ekki nýjan samning hjá Manchester United

Michael Owen hefur spilað sinn síðasta leik fyrir Manchester United en hann tilkynnti það á twitter-síðu sinni í dag að Sir Alex Ferguson, stjóri Manchester United, hafi sagt honum á þriðjudaginn að Owen fengi ekki nýjan samning.

„Stjórinn tilkynnti mér eftir góðgerðaleikinn á þriðjudaginn að félagið myndi ekki bjóða mér nýjan samning. Ég elskað hverja einustu mínútu sem ég hef eytt hjá þessu félagi undanfarin þrjú ár," skrifaði Michael Owen.

Michael Owen hefur einnig leikið með Liverpool, Real Madrid og Newcastle á sínum ferli en hefur verið meira eða minna meiddur undanfarin ár. Owen náði sem dæmi aðeins að spila fjóra leiki í öllum keppnum á þessu tímabili og sá síðasti var Meistaradeildarleikur á móti Otelul Galati í nóvember þar sem hann fór meiddur af velli eftir aðeins tíu mínútur.

Michael Owen er enn bara 32 ára gamall og ætlar að leita sér að nýju félagi eftir að stutt frí með fjölskyldunni. Owen skoraði 17 mörk í 52 leikjum með Manchester United í öllum keppnum þar af 7 mörk í 7 leikjum í enska deildarbikarnum.