Enski boltinn

Framtíð Hazard: City og United funda bæði með Lille í næstu viku

Óskar Ófeigur Jónsson skrifar
Það er ekki létt verk að stoppa Eden Hazard.
Það er ekki létt verk að stoppa Eden Hazard. Mynd/Nordic Photos/Getty
Framtíð Eden Hazard ræðst væntanlega í næstu viku eftir að forráðamenn Lille hafa fundað með bæði Manchester City og Manchester United en ensku stórliðin ætla að berjast um þennan efnilega Belga. Lille vill ekki ræða við Manchester-félögin fyrr en eftir lokaleik tímabilsins sem er nú um helgina.

Eden Hazard er 21 árs gamall en þetta er fjórða alvöru tímabilið hans með franska liðinu. Hann hefur gefið það út að hann muni spila í Manchester-borg á næstu leiktíð. Chelsea, Tottenham og Real Madrid hafa einnig áhuga en það lítur fyrir að keppnin standi á milli City og United.

Hazard hefur skorað 17 mörk og gefið 16 stoðsendingar í 37 deildarleikjum með Lille á leiktíðinni en hann var kosinn besti leikmaður frönsku deildarinnar annað árið í röð. Hann er einnig búinn að skora sitt fyrsta landsliðsmark fyrir Belgíu og forráðamenn Lille eru búnir að sætta sig við það að Hazard vilji fara í stærra félag.




Fleiri fréttir

Sjá meira


×