Leikurinn um Samfélagsskjöldinn fer fram á Villa Park

Leikur Englandsmeistara Manchester City og bikarmeistara Chelsea um Samfélagsskjöldinn í haust mun ekki fara fram á Wembley heldur á Villa Park í Birmingham. Leikurinn á að fara fram 12. ágúst eða daginn eftir að úrslitaleikurinn í fótboltakeppni Ólympíuleikanna fer fram á Wembley.

Ólympíuleikarnir fara fram í London frá 27. júlí til 12. ágúst og sættist enska knattspyrnusambandið á beiðni bresku Ólympíunefndarinnar að færa leikinn frá London.

Leikur Englands- og bikarmeistaranna hefur farið fram á gamla eða nýja Wembley frá 1974 fyrir utan árin 2001-2006 þegar spilað var á Millennium Stadium í Cardiff í wales á meðan nýi Wembley var í byggingu.

Það kom einnig til greina að spila leikinn á St James' Park í Newcastle, á Stadium of Light í Sunderland, á City of Manchester Stadium eða á Anfield í Liverpool.