Villas-Boas í viðtal hjá Liverpool | Laudrup vill koma

Enskir fjölmiðar fjalla áfram mikið um leit Liverpool að eftirmanni Kenny Dalglish. Daninn Michael Laudrup hefur nú verið orðaður við starfið.

Þetta kemur fram á fréttavef Sky Sports í dag. Þar er Laudrup sagður áhugasamur um starfið og að hann sé einn þeirra tólf manna sem eigendur Liverpool hafa áhuga á að ræða við.

Guardian segir að Andre Villas-Boas, fyrrum stjóri Chelsea, muni fara í viðtal hjá Liverpool í næstu viku en að John Henry, eigandi félagsins, hafi ekki sett sig í samband við Rafael Benitez - enn sem komið er.

Þar kemur enn fremur fram að þeir Pep Guardiola og Fabio Capello séu efstir á óskalista Henry en þeir hafi gefið til kynna að þeir hafi ekki áhuga - né heldur Jürgen Klopp, stjóri Dortmund.

Brendan Rodgers, stjóri Swansea, var líka einn þeirra sem Liverpool vildi fá í viðtal en hann hafnaði þeirri bón í dag.