Capello sækist eftir stjórastöðu í ensku úrvalsdeildinni

Fabio Capello, fyrrum þjálfari enska landsliðsins, er ekki tilbúinn að setjast í helgan stein og vill fá tækifæri til að stýra liði í ensku úrvalsdeildinni. Þetta kemur fram í viðtali við Times.

Capello er orðinn 65 ára gamall en hann hætti með enska landsliðið í febrúar eftir að hafa þjálfað liðið frá desember 2007. Capello hefur unnið titla með liðum eins og AC Milan, Real Madrid, Roma og Juventus.

„Það yrði mjög áhugavert fyrir mig að taka við ensku liði því ég þekki orðið svo vel ensku liðin og ensku leikmennina," sagði Fabio Capello við blaðamann the Times.

„Ég vil fá að stýra liði sem vill vinna eitthvað ef það er mögulegt," sagði Capello en hann hefur þegar hafnað nokkrum tilboðum.

„Það sem mun gera starfið áhugavert fyrir mig er hvað býr í liðinu en ekki hvað ég fæ mikið borgað. Ég vil fá að stýra liði sem spilar í Meistaradeildinni og hefur tækifæri til að berjast um marga titla," segir Capello.