Terry: Lifum fyrir þetta

„Þetta var frábært. Þetta er það sem við lifum fyrir," sagði John Terry eftir sigur Chelsea á Liverpool í úrslitum ensku bikarkeppninnar í dag.

„Þetta hefur verið erfitt tímabil í bikarnum en það er mikið afrek hjá okkur að hafa unnið þetta. Það voru margir búnir að afskrifa okkur þar sem að við áttum að vera of gamlir, komnir yfir okkar besta eða með lélega liðsheild."

„En þegar við vorum komnir út í horn þá snerum við bökum saman. Við höfum staðið okkur frábærlega í síðustu 16-17 leikjum okkar," bætti hann við en gengi Chelsea stórbatnaði eftir að Andre Villas-Boas var rekinn í byrjun mars og aðstoðarmaður hans, Roberto Di Matteo, tók við.

„Það er enn einn risastór bikar eftir - Meistaradeildin. Það hefur verið helsta markmið eigandans frá fyrsta degi að vinna þá keppni."