Di Matteo: Liverpool skoraði á réttum tíma

Roberto di Matteo, stjóri Chelsea, sá sína menn steinliggja á móti Liverpool á Anfield í kvöld. Hann stillti upp hálfgerðu varaliði sem náði ekki að fylgja eftir sigrinum á Liverpool í bikarúrslitaleiknum á laugardaginn.

„Ég tel að Liverpool hafi verið betra liðið í kvöld. Þeir skoruðu á réttum tíma en þetta hefði allt getað þróast öðruvísi ef við hefðum ekki skotið í stöngina í byrjun leiksins. Þeir áttu samt sigurinn skilinn," sagði Roberto di Matteo sem gerði átta breytingar á byrjunarliði sínu frá því í bikarúrslitaleiknum.

„Við höfum náð langt af því að við höfum notað orku alls leikmannahópsins. Við höfum verið að spila erfiða leiki að undanförnu og þeir hafa verið krefjandi fyrir alla. Ég taldi að frískir fætur myndu gefa okkur betri möguleika í kvöld," sagði Di Matteo um val sitt á liðinu.

„Við eigum leik á sunnudaginn og þurfum núna að enda mótið vel til að fara á jákvæðu nótunum inn í úrslitaleik Meistaradeildarinnar," sagði Di Matteo.