Gerrard nær bikarúrslitaleiknum

Kenny Dalglish, stjóri Liverpool, segir að fyrirliðinn Steven Gerrard hafi jafnað sig fyllilega á meiðslum sínum og að hann verði klár í slaginn þegar að liðið mætir Chelsea í úrslitum ensku bikarkeppninnar þann 5. maí.

Gerrard missti af leik Liverpool gegn West Brom um helgina en hann var talinn tæpur vegna meiðsla í nára. En síðan þá hefur hann getað æft eðlilega og vandræðalaust.

„Hann er í góðu lagi," sagði Dalglish. „Þetta var bara varúðarráðstöfun og hefur hann getað æft alla þessa vikuna."

Liverpool mætir Norwich í ensku úrvalsdeildinni síðdegis á laugardaginn.