Micah Richards, leikmaður Manchester City, segir að það taki stundum á að taka þátt í titilbaráttu ensku úrvalsdeildarinnar. Hann hafi nánast fellt tár þegar að Manchester United fagnaði sigri gegn Blackburn í upphafi mánaðarins.
United vann 2-0 sigur með tveimur mörkum seint í leiknum en Richards batt vonir við að United myndi tapa stigum í leiknum.
„Ég hugsaði með mér eftir því sem leið á leikinn að það væri aldrei að vita. En United er alltaf líklegt til að skora og því vissi ég að það væri von á þessu," sagði Richards.
„Svo þegar þeir skoruðu og juku forystu sína á okkur enn frekar langaði mig til að gráta. Þannig hefur mér ekki liðið í mörg ár," bætti hann við. „Það er mikið af tilfinningum í fótbolta - ánægja og reiði en mig hefur aldrei langað til að gráta áður."
Eftir tap City fyrir Arsenal á sunnudaginn er United nú með átta stiga forystu á toppi deildarinnar og því hafa titilvonir City-manna minnkað enn frekar.
Richards: Langaði til að gráta
