Torres: Mikil vinna er loksins að skila sér

Fernando Torres, leikmaður Chelsea, fór á kostum í dag þegar hann gerði þrjú mörk gegn QPR á Stamford Bridge en leiknum lauk með 6-1 sigri þeirra bláklæddra.

Torres hefur verið í miklum erfileikum með að finna markaskóna frá því að leikmaðurinn gekk í raðir Chelsea í janúar árið 2011.

„Ég er virkilega ánægður með mína frammistöðu í dag," sagði Torres í viðtali við BBC sjónvarpstöðina eftir leikinn.

„Ég vissi að ef ég myndi leggja hart að mér þá myndu mörkin koma. Það sama má segja um liðið þessa daganna, við erum allir að leggja okkur fram og þá náum við árangri."

„Að komast í úrslitaleikinn í Meistaradeild Evrópu var mikilvægt en við ætlum okkur samt sem áður að ná í fjórða sætið í deildinni og það sást alveg frá byrjun hér í dag."