Breskir lögreglumenn bíða þess að geta handtekið Assange

Lögreglumenn hafa tekið sér stöðu fyrir framan sendiráð Ekvadors í Lundúnum og eru reiðubúnir til þess að handtaka Julian Assange, stofnanda WikiLeaks, ef hann kemur út úr byggingunni.

Stjórnvöld í Ekvador ákváðu í gær að veita Assange pólitískt hæli, en bresk stjórnvöld hafa heitið því að handtaka hann þegar hann yfirgefur sendiráð Ekvadors í Lundúnum.

Staða Assange er flókin, en óhætt er að segja að hann hafi reitt bandarísk stjórnvöld til reiði þegar WikiLeaks lak trúnaðarupplýsingum úr sendiráðum Bandaríkjanna um allan heim í helstu fjölmiðla og á Netið.

Að auki er hann sagður hafa gerst sekur um kynferðisbrot í Svíþjóð. William Hague, utanríkisráðherra Breta, segir að stjórnvöld þar í landi séu skuldbundin til þess að framselja Assange til Svíþjóðar vegna þeirra ásakana. Hann sagði að bresk stjórnvöld myndu ekki bregðast þeim skyldum sínum.

Það er því ákveðin pattstaða komin upp á meðan Assange er lokaður inni í sendiráði Ekvadors. Hague viðurkenndi að sú pattstaða gæti varað í mánuði eða jafnvel ár, en Assange hefur ekki yfirgefið sendiráðið frá 19. júní síðastliðnum þegar hann fór þangað og sótti um pólitískt hæli.