Fattaði tíu árum síðar að hann hafði kyngt gaffli

Lee Gardner, fertugur Breti, var fluttur á spítala í skyndi á dögunum vegna magaverkja. Þegar betur var að gáð kom í ljós að hann var með plastgaffal í maganum - og ekki nóg með það - gaffallinn hafði verið þar í 10 ár!

Gardner var með mikla magakrampa og kastaði upp blóði og ákvað því að leita til læknis. Þegar læknar tóku röntgenmynd af maganum tóku þeir eftir því að þar sást mótað fyrir gaffli. Þeir ætluðu varla að trúa sínum eigin augum og spurðu Gardner hvort hann hefði kyngt gaffli og neitaði hann því.

„Þegar þeir voru að skoða myndirnar spurði læknirinn mig: Ertu alveg viss um að þú hafi ekki kyngt einhverju? Ég svaraði neitandi en þegar hann spurði mig: Ertu alveg viss? Ég sé mótað fyrir einhverju í maganum þínum sem lítur út fyrir að vera gafall, þá man ég að ég hefði kyngt plastgaffli fyrir tíu árum síðan,“ segir Garnder.

Á sínum tíma leitaði hann til læknis sem sagði honum að hafa engar áhyggjur af þessu, hann myndi skila sér út á eðlilegan hátt. Hann varð þó ekki var við það og hreinlega steingleymdi að gaffalinn væri í maganum.

Ekki var talin ástæða til að framkvæma aðgerð á maganum og því þrýstu læknarnir á maga Garnder þannig hann skilaði sér út. Hann hefur verið útskrifaður af spítala og er talið að hann muni ná sér að fullu.