Giftu sig nakin

Þau fóru heldur óhefðbundna leið austurrísku hjónin sem giftu sig á dögunum. Melanie og Rene Schachner giftu sig nefnilega nakin til að gera brúðkaup sitt sem eftirminnilegast.

Og ekki nóg með það að standa nakin fyrir framan prestinn heldur buðu þau fjölmiðlum að koma í brúðkaupið sitt. „Við skömmumst okkar ekki fyrir líkama okkar og vildum gera eitthvað aðeins öðruvísi. Við spöruðum okkur pening með því að sleppa að kaupa okkur brúðkaupsföt," segir brúðurin.

Nýbökuðu hjónin segja að þau hafi skipulagt brúðkaupið í nokkur ár og hafi komist að niðurstöðu að fara þessa heldur óhefðbundnu leið. „Margir gestanna sögðu að þetta hefði verið frábær hugmynd hjá okkur og gerði daginn ennþá skemmtilegri," segir brúðurin Melanie.

„Sem betur fer var dásamlegt veður úti og mjög hlýtt annars hefði turtildúfunum eflaust orðið smá kalt," sagði einn gestanna í brúðkaupinu.

Í meðfylgjandi myndbandi má sjá brúðkaupsvídjóið sem hjónin létu útbúa fyrir sig.