Rafael van der Vaart vonast til þess að Modric verði kyrr

Hollenski landsliðsmaðurinn Rafael van der Vaart telur að liðsfélagi hans Luka Modric hjá enska liðinu Tottenham sé ekki á höttunum eftir hærri launum fari hann frá Tottenham í sumar. Hinn 25 ára gamli Modric kom flestum á óvart þegar hann sagðist vilja fara frá liðinu en Tottenham hefur þegar hafnað 22 milljóna punda tilboði í króatíska miðjumanninn.

Daniel Levy, stjórnarformaður Tottenham, hefur sagt að leikmaðurinn sé ekki til sölu og jafnvel 4 milljarða kr. tilboð í leikmanninn dugði ekki til að hnika þeirri skoðun.

Rafael van der Vaart segir að það sé alltaf erfitt fyrir félög að halda í leikmenn sem vilja fara. „Ef einhver er óánægður þá er erfitt að breyta því. Luka og Gareth Bale eru ekki í þessu fyrir peningana sem þeir fá. Þeir vilja vinna titla, og ef þeir telja sig þurfa að fara í annað lið þá er það þeirra ákvörðun. Ég vona samt að þeir verði áfram, báðir eru þeir frábærir leikmenn og mikilvægir fyrir liðið," sagði Van der Vaart á fyrstu æfingu Tottenham eftir sumarfrí.