Spilaði meiddur til þess að greiða veðmálaskuldir

Knattspyrnumaðurinn Michael Chopra hefur viðurkennt að eiga við spilafíkn að stríða. Það sem meira er þá hefur hann tapað 370 milljónum króna í veðbönkum.

Chopra segist hafa verið fastur í vítahring en hann hefur meðal annars tekið upp á því að spila meiddur því hann vantaði pening til að greiða skuldir.

"Fyrsta veðmálið er það versta. Á síðustu árum hef ég eignast meiri pening og þá hef ég einfaldlega veðjað meira," sagði Chopra.

"Ég var að veðja fyrir allt að fjórar milljónir króna á dag. Ég gat alltaf einbeitt mér samt að boltanum en um leið og ég var kominn út úr klefanum fór ég í símann til að athuga hvort ég hefði unnið."

Chopra hefur farið víða á skrautlegum ferli og hann viðurkennir að hafa farið frá Cardiff til Sunderland því hann fékk stóra upphæð er hann skrifaði undir samninginn. Hann þurfti á þeim peningum að halda til að greiða skuldir tengdar veðmálum.

Hann leikur nú með Ipswich, hefur farið í meðferð og er á góðum batavegi.