Sagna fékk heilahristing

Arsene Wenger, stjóri Arsenal, hefur staðfest að Bacary Sagna hafi fengið heilahristing í leiknum gegn Ipswich í gær.

Arsenal tryggði sér sæti í úrslitum ensku deildabikarkeppninnar með 3-0 sigri á Ipswich í gær en Sagna þurfti að fara af velli strax á átjándu mínútu. Hann hlaut þungt höfuðhögg eftir samstuð við liðsfélaga sinn og markvörð Arsenal, Wojciech Szczesny.

Wenger sagði að Sagna hefði liðið illa eftir leikinn og hafi verið fluttur upp á sjúkrahús. „Vonandi fáum við góðar fréttir á morgun," bætti hann við.

Þó er talið líklegt að Sagna þurfi að hvíla sig í nokkra daga sem er nauðsynlegt eftir heilahristing. Samkvæmt því mun hann ekki spila með Arsenal í bikarleiknum gegn Huddersfield um helgina.