Wenger ætlar að fara sér hægt á leikmannamarkaðnum

Arsene Wenger, stjóri Arsenal, er pollrólegur þó svo verið sé að orða stórstjörnur liðsins við önnur félög þessa dagana. Sjálfur segist hann ætla að fara sér hægt á leikmannamarkaðnum.

Flest bendir þó til þess að Gervinho komi frá Lille og svo er unglingurinn Alex Oxlade-Chamberlain einnig orðaður við Arsenal.

"Það eru allir rólegir í augnablikinu og enginn farinn. Það búast allir við að einhver annar taki fyrsta skrefið. Menn halda þétt um spilin sín," sagði Wenger.

"Það fer enginn almennilega af stað fyrr en í lok júlí og byrjun ágúst. Ég er engu að síður duglegur í símanum og við sjáum hvað setur."