Wenger stressaður yfir því að landsliðsmenn hans meiðist

Arsene Wenger, stjóri Arsenal, hefur aldrei farið leynt með andúð sína á, að hans mati, tilgangslausum vináttulandsleikjum enda hafa leikmenn Arsenal verið duglegir við að meiðast í landsliðsverkefnum síðustu árin.

Wenger viðurkennir að hann sé nú á nálum enda búinn að horfa á eftir mörgum sínum leikmönnum til móts við landsliðin sín.

„Það er svo sannarlega engin ánægja sem fylgir því að sjá á eftir mínum leikmönnum í landsliðsverkefni en vonandi sakar engann og leikmennirnir koma vonandi heilir og í góðum gír til baka," sagði Arsene Wenger.

„Það væri sárt og slæmt að missa leikmenn í meiðsli en ég tel þó að það muni ekki stoppa taktinn í liðinu. Það er líka alltaf áskorun að fá leikmenn til að ná upp einbeitingu á ný þegar þeir snúa aftur eftir landsliðsverkefni. Vonandi gengur það vel núna," sagði Arsene Wenger.