Torres: Ekki enn náð mínu besta fram

Fernando Torres segir að hann hafi ekki enn náð sínu besta fram þó svo að hann hafi skorað bæði mörkin í 2-0 sigri Liverpool á Chelsea í dag.

Torres hefur átt við meiðsli að stríða lengi vel á þessu ári og var langt frá sínu besta í fyrstu leikjum Liverpool á tímabilinu.

„Þetta hefur verið erfitt hjá mér vegna meiðslanna en ég æfi og bæti mig á hverjum degi," sagði Torres.

„Ég veit ekki hvort ég get spilað eins og ég get best í náinni framtíð - en ég mun gera það um leið og mögulegt er. Ég veit hvaða væntingar eru gerðar til mín og ég get tekist á við það."

„Nú verðum við að halda áfram að vinna. Við höfum unnið þrjá leiki á síðustu sjö dögum en við verðum að gleyma því núna og halda áfram að safna stigum."