Ramsey ætlar að taka því rólega

Aaron Ramsey, leikmaður Arsenal, ætlar að flýta sér hægt eftir meiðsli sín sem hafa haldið honum á hliðarlínunni undanfarna níu mánuði.

Ramsey spilaði sinn fyrsta leik eftir meiðslin með varaliði Arsenal á þriðjudagskvöldið.

„Ég var búinn að bíða lengi eftir þessu og gat ekki beðið eftir því að komast út á völlinn," sagði hann í viðtali á heimasíðu Arsenal.

„Mér fannst það auðvitað frábært að spila og mér gekk ágætlega. Ég var orðinn svolítið þreyttur eftir 20 mínútur og þarf að bæta úthaldið."

Framundan hjá Ramsey eru fleiri leikir með varaliðinu og stefnir hann svo á að vinna sér aftur sæti í aðalliðinu. „Ég mun ekki hoppa beint í aðalliðið og ég þarf að taka því rólega. Þetta tekur allt sinn tíma."

Ramsey fótbrotnaði á tveimur stöðum eftir tæklingu frá Ryan Shawcross í leik gegn Stoke á síðustu leiktíð. Shawcross fékk vitanlega að líta rauða spjaldið fyrir tæklinguna.