Cahill vill fara til stærri félags

Gary Cahill, leikmaður Bolton, vill gjarnan fá tækifæri hjá stóru félagi á næstu árum. Cahill er 24 ára gamall og þykir hafa staðið sig vel með Bolton undanfarið.

„Ég er með mikinn metnað og vil ná því allra besta úr mér," sagði Cahill sem var valinn í enska landsliðið í fyrsta sinn í september síðastliðnum.

„Hver veit hvað gerist í framtíðinni? Núna vil ég einbeita mér að því að spila með Bolton og vonandi mun ég spila með stóru félagi einn daginn."

Hann hefur verið orðaður við lið eins og Manchester United og Liverpool. „Það er gott að það skuli verið að fylgjast með mér en það er mikilvægt að halda áfram að spila vel."