Ívar Ingimarsson að komast aftur af stað eftir meiðsli

Ívar Ingimarsson er allur að koma til eftir að hafa verið frá í rúmt hálft ár vegna erfiðra meiðsla. Hann stefnir að því að vinna sér aftur sæti í liði Reading.

Ívar var á varamannabekk liðsins þegar að Reading vann 1-0 sigur á Ipswich í gær. Þetta var í fyrsta sinn sem hann var í leikmannahópi liðsins síðan hann meiddist í mars síðastliðnum.

„Það rifnaði vöðvafesting í lærinu og þurfti að festa hana aftur við beinið," sagði Ívar í samtali við Vísi. „Aðgerðin er ekkert allt of flókin en það tekur bara tíma fyrir festinguna að verða aftur sterk. Það góða við slíkar aðgerðir er að það eru 99 prósent líkur á að maður nái sér góðum sem virðist ætla að ganga eftir."

Hann segir að þessi tími á hliðarlínunni hafi ekki verið mjög erfiður fyrir hann. „Nei, það þýðir ekkert að gráta þetta. Þetta hefur verið stíf endurhæfing og það er gott að finna fyrir því að maður er aftur að nálgast sitt gamla form."

Ívar segir að endurhæfingin hafi gengið vel og að hann sé ekki hræddur við að beita sér af fullum krafti. „Það hefur verið mikið af lyftingum og æfingum þar sem ég hef verið að toga vel í þetta. Þetta heldur vel og því ekkert annað að gera en að æfa áfram vel. Það góða við þetta er að þetta eru ekki krónísk meiðsli og ættu ekki að há mér í framtíðinni."

Reading er nú í sjötta sæti ensku B-deildarinnar og segir Ívar að sér lítist vel á tímabilið sem er framundan.

„Við unnum í gær og erum í ágætri stöðu í deildinni en það er enn lítið liðið af tímabilinu. En við höfum verið að líta ágætlega út og spila ljómandi vel. Helst er að það hefur vantað að skora fleiri mörk en þau hafa verið að koma og vonandi á það eftir að aukast enn."

„Ef við sleppum nokkuð vel við meiðsli og leikbönn á tímabilinu tel ég að við séum með nægilega gott lið til að vera í efstu sætunum."