Moyes: Rétt að gefa Grétari rautt

Vendipunkturinn í leik Everton og Bolton í ensku úrvalsdeildinni í dag var þegar Grétar Rafn Steinsson var rekinn af velli. Hann braut á Yakubu og Everton komst yfir úr aukaspyrnu Mikel Arteta sem fylgdi í kjölfarið.

„Við vorum eina liðið sem vildi vinna þennan leik og áttum það skilið. Bolton ógnaði ekkert nema aðeins úr föstum leikatriðum," sagði knattspyrnustjóri Everton, David Moyes.

„Ég er búinn að skoða atvikið aftur og dómarinn tók rétta ákvörðun," segir Moyes um brot Grétars. „Yak var réttstæður og það er klárlega brotið á honum."

Owen Coyle, stjóri Bolton, taldi Yakubu hafa verið rangstæðan. „Ég þarf samt að skoða þetta aftur. Ef það var einhver snerting þá var hún minniháttar. Ég er samt mest ósáttur við að Arteta komst upp með að færa boltann framar og taka aukaspyrnuna nær markinu en þar sem brotið átti sér stað," sagði Coyle eftir leik.

Þess má geta að Victor Anichebe, leikmaður Everton, fór meiddur af velli í leiknum og fór hann síðan á sjúkrahús. Ekki er víst hve lengi hann verður frá.