Euell fórnarlamb kynþáttahaturs í leik gegn Stoke

Enska úrvalsdeildarfélagið Stoke hefur formlega beðið Jason Euell, leikmann Blackpool, afsökunnar á hegðun stuðningsmanns Stoke.

Umræddur stuðningsmaður gerði sig sekann um kynþáttahatur í garð Euell á meðan á leik Stoke og Blackpool stóð í enska deildarbikarnum á þriðjudagskvöld en Stoke vann leikinn 4-3.

Stoke lítur málið því vitanlega mjög alvarlegum augum.

„Við þurfum fyrst að bíða þess að lögreglurannsókn ljúki áður en við getum sjálfir refsað viðkomandi aðila. Britannia-leikvangurinn er fjölskylduvænt umhverfi og svona hegðun verður auðvitað ekki liðin.

Fyrir hönd stoke þá biðjum við Jason Euell og Blackpool innilegrar afsökunnar á hegðun þessa einstaklings," segir í yfirlýsingu frá Stoke.