FIFA mun ekki rannsaka United

Alþjóða knattspyrnusambandið, FIFA, hefur ákveðið að ekki sér þörf á því að framkvæma rannsókn á Manchester United í kjölfær kæru Fiorentina á Ítalíu.

Forsaga málsins er sú að hinn 16 ára gamli Michele Fornasier gekk í sumar til liðs við United. Hann var ekki samningsbundinn Fiorentina þar sem hann var of ungur til þess samkvæmt ítalskri löggjöf.

Álíka mál hafa verið í sviðsljósinu að undanförnu eftir að Chelsea var refsað fyrir að hafa hvatt ungan leikmann til að rifta samningi sínum við franska félagið Lens og ganga til liðs við sig.

Í kjölfarið ákvað FIFA að banna Chelsea að kaupa nýja leikmenn til félagsins fyrr en í janúar árið 2011.

United hefur einnig verið sagt hafa lokkað til sín annan franskan táning - Paul Pogba frá Le Havre, á samskonar máta.

Talsmaður FIFA staðfesti að sambandinu hefði borist kæra frá Fiorentina. En sambandið hefði ákveðið að aðhafast ekki frekar í málinu. Ekki væri talin ástæða til þess.

Sambandið hefði þar að auki ekkert heyrt frá forráðamönnum Le Havre vegna Paul Pogba.