Fjórir skotnir í Íran

Lögregla í Teheran í Íran hefur skotið fjóra menn til bana í mótmælum sem fram fara í tengslum við hátíðarhöld Sítamúslíma í borginni. Yfirvöld hafa varað mótmælendur við hörðum viðbrögðum lögreglu ef þeir reynda að boða til mótmæla í tengslum við hátíðarhöldin.

Tugir þúsunda Írana fagna nú víðs vegar í Íran á tíunda degi hátíðarhalda til að minnast hetjudauða Imam Hussein fyrir 700 árum, sem er dáðasti spámaður Sítamúslíma.

Mahmoud Ahmadinejad forseti Írans tók þátt í hátíðarhöldunum í miðborg Teherans, höfuðborg landsins, í dag. Lögregla hefur girt af götur sem liggja að miðborginni til að koma í veg fyrir að þúsundir mótmælenda nái að safnast saman í miðborginni.

Vitni og vefsíður stjórnarandstæðinga fullyrða að fjórir mótmælendur hafi verið skotnir til bana af lögreglu í miðborginni eftir að lögreglumenn hleyptu fyrst af viðvörunarskotum til að dreifa hópi stjórnarandstæðinga. Opinberir fjölmiðlar hafa ekki greint frá þessu og hafa alþjóðlegar fréttastofur ekki náð að fá þessar fréttir staðfestar, enda eru miklar hömlur á starfsemi þeirra í landinu.

Ef rétt reynist eru þetta mannskæðustu átök lögreglu og mótmælenda frá því í miklum mótmælum eftir forsetakosningarnar í Íran í júní. Yfirvöld höfðu varað mótmælendur við að safnast saman í tengslum við trúarhátíðina og hótað hörðum viðbrögðum lögreglu.