„Drepum bin Laden“

Nemandi við West Point-herskólann í New York sendi Barack Obama Bandaríkjaforseta þögul en áhrifamikil skilaboð þegar forsetinn ávarpaði nemendur skólans á þriðjudaginn og ræddi um stefnu Bandaríkjanna í Afganistan og Pakistan. Nemandinn, Konrad Bunde, sat framarlega í áheyrendahópnum, djúpt sokkinn í bókina „Drepum bin Laden" eða „Kill Bin Laden" á frummálinu, og hélt bókinni þannig að kápa hennar blasti við Obama.

Titillinn er prentaður stórum stöfum ofan á mynd af fjalllendi í Tora Bora í Austur-Afganistan en þar er einn hugsanlegra felustaða bin Laden talinn vera. Höfundur bókarinnar er Dalton Fury en það er í raun dulnefni fyrrum sérsveitarforingjans Thomas Greer sem stjórnaði leit Delta-sveitar Bandaríkjahers að bin Laden í Afganistan á haustmánuðum 2001. Ávarp Obama stóð yfir í rúman hálftíma en ekki er vitað til þess að hann hafi gert athugasemd við lesefni herskólanemans.