Landbúnaðarráðherra Bandaríkjanna hættir

Mike Johanns landbúnaðarráðherra Bandaríkjanna hefur hætt störfum eftir næstum þrjú ár í embætti. Johanns býður sig fram til öldungadeildarþings í Nebraska, þar sem hann naut vinsælda sem ríkisstjóri tvö kjörtímabil. Bush Bandaríkjaforseti tilkynnti ákvörðun Johanns í dag, en hann er sá síðasti í röð háttsettra embættismanna í stjórn Bush að láta af embætti.

Áður höfðu Alberto Gonzales ríkissaksóknari og Karl Rove stjórnmálaráðgjafi forsetans til langs tíma, hætt í embætti.

Búist er við að Johanns tilkynni framboð sitt strax á mánudag. Hann býður sig fram til sætis Chuck Hagel sem sat á þinginu í tvö kjörtímabil. Fréttaskýrendur segja að Johanns gæti orðið fremstur í röð frambjóðenda Repúblíkanaflokksins.