Erlent

Íbúar Tuusula í algjöru sjokki

Sigríður Guðlaugsdóttir skrifar
Nemendur skólans vísað frá skólanum eftir voðaverkin.
Nemendur skólans vísað frá skólanum eftir voðaverkin.

„Hér ríkir gríðarleg sorg og reiði eftir þessi voðaverk og fólk er í algjöru sjokki," segir Bryndís Hólm, fréttaritari Stöðvar 2. Hún er stödd fyrir utan Jokela-skólann í Tuusula í Finnlandi þar sem byssumaður skaut átta manns til bana í gær. Bryndís segir reiði fólks aðallega beinast að því af hverju ekki var hægt að koma í veg fyrir voðaverkin.

Varla sála er á ferli í finnska bænum og margir foreldrar halda sig heima við með börnum sínum.

Í samtali Bryndísar við Hanno Joensivu, bæjarstjóra Tuusula, kom fram að allt bæjarsamfélagið væri enn að melta það sem gerðist, fólk væri í algjöru áfalli. Hann telur það eiga eftir að taka langan tíma fyrir samfélagið að komast yfir þenna skelfilegan atburð. Nú taki við starf bæjarins að telja íbúunum trú um að enn sé gott að búa í bænum.

Skólinn er afgirtur og á skólalóðinni eru einungis hermenn eða lögreglumenn. Veður er stillt og fallegt en afar kalt, um fimm stiga frost. Eitthvað er um að krakkar komi að skólanum og kveiki á kertum til minningar um þá sem létust. Bryndís segir að þeir tali ekki við fjölmiðla, flestir þeirra séu mjög sorgmæddir og með tárin í augunum.

Tugir fjölmiðlamanna hafa safnast saman utanvið skólann. Bryndís áætlar að um 20-30 sjónvarpsstöðvar séu á staðnum, jafnmargar útvarpsstöðvar og fjöldi blaðamanna.

Minningarathöfn var haldin í bænum í gær og í dag verður stór minningarathöfn í Helsinki.


Tengdar fréttir

Ólafur Ragnar sendi Halonen samúðarkveðju

Forseti Íslands, Ólafur Ragnar Grímsson, sendi í kvöld Tarja Halonen forseta Finnlands samúðarkveðju. Finnska þjóðin er felmtri slegin yfir atburðunum í Tuusula fyrr í dag þegar nemandi í menntaskóla myrti átta manns.

Myndband á YouTube talið tengt skotárás í Finnlandi

Tveir hið minnsta eru látnir og einhverjir særðir eftir að 18 ára piltur hóf skotárás í Jokela-skólanum í bænum Tuusula í Suður-Finnlandi. Meðal þeirra sem urðu fyrir skoti var skólastjórinn.

Finnski fjöldamorðinginn lést á sjúkrahúsi

Nemandinn sem gekk berserksgang í menntaskóla í bænum Tuusula í suðu Finnlandi í dag lést af völdum skotsárs sem hann veitti sjálfum sér. Pilturinn sem var 18 ára gamall, myrti sjö nemendur og einn kennara áður en hann skaut sjálfan sig. Hann hét Pekka Eric Auvinen.




Fleiri fréttir

Sjá meira


×