Íslenska vörnin meðal þeirra slökustu í Evrópu

Ísland er enn með sjöundu slökustu vörn Evrópu eftir 3-0 tap í Liechtenstein í gær. Á útivelli er Ísland í 5.-6. sæti fyrir flest mörk fengin á sig í undankeppni EM 2008.

Eftir leik Íslands og Lettlands um helgina sagði Vísir frá því að Ísland væri með sjöundu slökustu vörn í Evrópu miðað við árangurinn í undankeppni EM 2008. Fimmtíu þjóðir taka þátt í undankeppninni.

Það er sama hvar er komið niður í tölfræðinni, alltaf er Ísland í hóp lélegustu þjóða Evrópu.

Þegar árangurinn er reiknaður út er Ísland í 40. sæti af 50 þjóðum með 0,73 stig að meðaltali í leik.

Íslenska sóknin er í 36. sæti með 0,91 mark skorað að meðaltali í hverjum leik.

Ísland er í 39. sæti þegar árangur á heimavelli er reiknaður út en sigur Íslands í Belfast í fyrstu umferð keppninnar fleytir liðinu í 36.-41. sæti yfir árangur á útivelli.

Íslenska liðið hefur fengið þrettán mörk á sig á útivelli. Aðeins fjórar þjóðir í Evrópu státa af verri árangri. Það eru San Marínó (31 mörk fengin á útivelli), Andorra (25), Færeyjar (21) og Liechtenstein (15).

Aserbaídsjan og Moldóva hafa fengið þrettán mörk á sig á útivelli, rétt eins og Ísland. Aðrar þjóðir í gjörvallri Evrópu hafa fengið færri mörk á sig á útivelli.

Tíu slökustu varnir Evrópu:

1. San Marínó: 4,73 mörk fengin á sig að meðaltali í leik.

2. Andorra: 3,90

3. Færeyjar: 3,64

4. Liechtenstein: 2,55

5. Aserbaídsjan: 2,50

6. Malta: 2,20

7. Ísland: 2,18

8.-10. Slóvakía: 2,00

8.-10. Hvíta Rússland: 2,00

8.-10. Lúxemborg: 2,00

Tuttugu lélegustu lið Evrópu:

1.-3. Andorra: 0 stig fengin að meðaltali í leik

1.-3. San Marínó: 0

1.-3. Færeyjar: 0

4. Lúxemborg: 0,27

5. Eistland: 0,36

6.-7. Malta: 0,50

6.-7. Aserbaídsjan: 0,50

8. Kasakstan: 0,58

9. Liechtenstein: 0,64

10. Hvíta Rússland: 0,70

11. Ísland: 0,73

12. Moldóva: 0,82

13.-14. Lettland: 0,90

13.-14. Armenía: 0,90

15. Georgía: 0,91

16.-17. Slóvenía: 1,00

16.-17. Litháen: 1,00

18.-19. Albanía: 1,10

18.-19. Makedónía: 1,10

20. Ungverjaland: 1,20