Steve Bruce að taka við Wigan

Allt útlit er fyrir að Steve Bruce taki við Wigan á allra næstu dögum en Dave Whelan, eigandi liðsins, sagði að allir aðilar væru búnir að ná samkomulagi um það.

Klásúla í samningi Bruce hjá Birmingham þar sem hann starfar nú sem knattspyrnustjóri segir að honum sé frjálst að fara frá félaginu fyrir þrjár milljónir punda.

Whelan segir að félagið muni borga þá upphæð og honum finnst það vel sloppið fyrir svo góðan knattspyrnustjóra.

„Það lítur út fyrir að það sé búið að ná samkomulagi um samningsmál en það hefur ekkert verið undirritað enn sem komið er," sagði Whelan.

Chris Hutchins var sagt upp störfum sem knattspyrnustjóra Wigan í upphafi mánaðarins eftir að hann stýrði liðinu í tólf leikjum.

Bruce hefur verið starfandi hjá Birmingham í sex ár en stýrði Wigan í sjö vikur árið 2001.