Dennis Wise kærður

Enska knattspyrnusambandið hefur kært Dennis Wise, stjóra Leeds, fyrir orðljótan munnsöfnuð gagnvart dómara leiks liðsins gegn Gillingham á laugardag.

Sambandið mun einnig rannsaka framgöngu dómarans, Danny McDermid, í leiknum. Tveir leikmenn Leeds, Tresor Kandol og Jermaine Beckford, fengu að líta rauða spjaldið í leiknum.

Leeds hefur kært dómarann til sambandsins fyrir framkomu hans gagnvart Wise að leiknum loknum. 

„Mér finnst þetta algerlega óásættanlegt,“ sagði Wise eftir leikinn sem lauk með 1-1 jafntefli.

Þetta voru fyrstu stigin sem Leeds tapaði á tímabilinu eftir átta sigurleiki í röð. Liðið situr þó í fjórtánda sæti deildarinnar þar sem það hóf tímabilið með fimmtán stig í mínus.