Innflytjendur flykkjast nú í mestu mæli til Bandaríkjanna en ekki Frakklands

Svo virðist sem Frelsisstyttan þyki álitlegri en Eiffel-turninn, því Frakkland er ekki lengur sú iðnaðarþjóð sem laðar að flesta innflytjendur og skjótast Bandaríkin upp í fyrsta sæti í því kapphlaupi. Í fyrsta sinn í rúman áratug dregur úr fjölda innflytjenda í Frakklandi.

Þetta kemur fram í skýrslu nefndar sem vinnur að málum innflytjenda og Dominique de Villepin, forsætisráðherra Frakka, kynnir. Þar kemur fram að á seinasta ársfjórðungi ársins 2005 lækkaði hlutfall innflytjenda í Frakklandi sem komu frá löndum utan Evrópusambandsins um 2,57%.

Þó talan sé lág, markar þetta samt sem áður samdrátt í fjölda innflytjenda í Frakklandi eftir mikla aukningu í rúman áratug. Fór aukningin mest í 21% á milli áranna 2000 og 2002. Ástæðu fækkunarinnar má rekja til lagasetningar innanríkisráðherra Frakklands, Nicolas Sarkozy, árið 2003 sem lýtur að því að stemma stigu við frjálsu flæði innflytjenda. Einnig fækkar erlendum nemendum við franska háskóla.

Hælissækendum fjölgar þó enn í Frakklandi eða um 11% en hælisumsóknarferlið tekur um eitt ár.