Flutt með valdi frá New Orleans

Bandarísk yfirvöld hafa nú misst þolinmæðina við þá sem neita að yfirgefa New Orleans, og eru að byrja að flytja þá á brott með valdi. Mikil hætta er talin á farsóttum í borginni. Vatnsborðið í New Orleans er nú byrjað að lækka, en það er ekki fagurt sem kemur í ljós. Úrgangur og drulla og fljótandi lík gera borgina að hreinu pestarbæli og er talin mikil hætta á drepsóttum. Enn eru um tíuþúsund manns í borginni, sem margir hverjir vilja ekki vilja fara þaðan. Herflokkar fara nú um götur borgarinnar, bæði til þess að skrá fólk og bjóða því aðstoð. Hermenn ganga hús úr húsi og sannreyna hvort að einhverjir séu þar enn. Ef svo er þá bjóða þeir alla aðstoð, í formi matar og drykkjarvatns og skrá síðan niður íbúana. Hermennirnir láta yfirvöld vita hvar íbúa er að finna og þá tekur lögreglan við. Bæði borgarstjórinn og lögreglustjórinn hafa sagt að ekki sé forsvaranlegt að láta fólk dvelja áfram í New Orleans, vegna smithættu. Það verði því flutt á brott, með góðu eða illu.