Vantraust samþykkt á stjórnina

Ríkisstjórn Gerhards Schröders, kanslara Þýskalands, er fallin. Þýska þingið samþykkti nú í morgun vantrauststillögu á stjórnina með 296 atkvæðum gegn 151. 148 þingmenn sátu hjá. Schröder hafði hvatt þingmenn til að ljá vantrauststillögunni atkvæði sitt svo flýta mætti kosningum. Það gekk eftir en Schröder hafði lýst því yfir að hann yrði að fá endurnýjað umboð frá kjósendum til að koma heldur óvinsælum tillögum ríkisstjórnarinnar um efnahagsumbætur í gegn. Það er forsetinn, Horst Köhler, sem ákveður hvort þingið verði leyst upp og boðað til kosninga ári fyrr en ætlað var. Hann hefur þrjár vikur til að taka ákvörðunina en ýmsir hafa gagnrýnt Schröder fyrir allt þetta sjónarspil og telja það að fella eigin ríkisstjórn vísvitandi geti jafnvel strítt gegn stjórnarskránni. Þetta á sér þó fordæmi. Árið 1982 tapaði þáverandi kanslari, Helmut Kohl, viljandi kosningu um vantraust á ríkisstjórn sína til að auka meirihluta sinn á þingi í næstu kosningum. Það var dæmt löglegt en það er ljóst að stjórnarskrárdómstóll Þýskalands mun fjalla um mál Schröders nú og fræðilega er mögulegt að dómstóllinn komist að annarri niðurstöðu en forsetinn. Það er þó ljóst að mikill stuðningur er í samfélaginu við að flýta kosningum. SPD, flokkur Schröders, getur þó síður en svo treyst því að hann beri sigur úr býtum ef kosningar verða haldnar í haust en flokkurinn hefur tapað illa undanfarið í mikilvægum héraðskosningum. Kristilegir demókratar, CDU, með Angelu Merkel í broddi fylkingar, gætu hæglega skotist upp fyrir sósíaldemókratana og náð völdum. Kristilegir demókratar hafa undanfarið mælst með allt upp í tuttugu prósentustigum meira fylgi í skoðanakönnunum. Merkel yrði þá fyrst kvenna til að gegna embætti kanslara Þýskalands.