Níu létust í Danmörku og Svíþjóð

Að minnsta kosti 9 manns fórust í óveðri sem gekk yfir Danmörku og hluta Svíþjóðar í gær. Rafmagn fór af tæplega fimm hundruð þúsund heimilum í löndunum tveimur. Danskir fjölmiðlar segja rafmagn hafa farið af 60 þúsund heimilum og sænskir tala um 410 þúsund heimili. Í Danmörku fórust tveir ökumenn þegar tré féllu á bíla þeirra og aðrir tveir þegar þak af húsi fauk á þá þar sem þeir voru á gangi. Að minnsta kosti þrír hinna látnu bjuggu á Fjóni. Svipaða sögu er að segja frá Svíþjóð, en hið sænska Dagbladet segir að minnsta kosti fimm hafa látist og suma vegna trjáa sem féllu á bíla þeirra. Í báðum löndum er unnið að því að koma rafmagni á aftur og reiknað er með að það takist í dag. En það verður fróðlegt að fylgjast með framvindu mála næstu daga, sérstaklega hvað varðar rafmagn og hitaleysi í híbýlum fólks því stjórnvöld voru gagnrýnd mikið eftir svokallaðan fellibyl aldarinnar, sem gekk yfir Danmörku, Svíþjóð og norðurhluta Þýskalands í desember 1999. Þá létust 18 manns í löndunum þremur og gríðarlegt eignartjón varð og langan tíma tók að koma öllu í samt lag. Eftir þann harmleik sögðu opinberir aðilar og fyrirtæki að þau hefðu lært sína lexíu. Fellibylur er skilgreindur 33 metrar á sekúndu en í Damörku í gær fóru mestu vindhviðurnar í 49 metra. Skemmdirnar eru gríðarlegar og birtar hafa verið myndir í sjónvarpi af ónýtum bílum undir trjám og 3 metra háu vatnsborði á götum bæja á Vestur-Jótlandi, sem fer minnkandi með deginum. Allt er borið saman við óveðrið 1999 og sem dæmi segir öryggisfyrirtækið Falck að útköllin nú verði nálægt 10.000 en þau voru 17.000 árið 1999. Samgöngur eru að komast í lag eftir lætin í gær en brúnum yfir Stóra- og Litlabelti ásamt Eyrarsundsbrúnni milli Danmerkur og Svíþjóðar var lokað. Þá er búið að opna aftur flugvellina í Kaupmannahöfn og Malmö.