Cameron blæs til sóknar

David Cameron var í gær kjörinn leiðtogi breska Íhaldsflokksins. Við kjör hans binda flokksmenn vonir um að eiga betri möguleika á sigri í næstu þingkosningum, eftir að hafa tapað þrisvar í röð fyrir Verkamannaflokkinum með Tony Blair í broddi fylkingar.

Cameron er 39 ára að aldri og þar með einn yngsti flokksleiðtoginn í sögu Íhaldsflokksins en hann er sá fimmti sem fer fyrir flokknum í átta ár. Hann er einkaskólagenginn sonur verðbréfamiðlara. Cameron var kokhraustur í fyrstu yfirlýsingum sínum í hinu nýja hlutverki; hann lýsti ríkisstjórn Verkamannaflokksins sem mönnum gærdagsins og hét því að koma henni frá.

"Við höfum á brattann að sækja," sagði hann þó, með eigin­konuna Samönthu sér við hlið, en hún gengur með þriðja barn þeirra hjóna. "En ef við stöndum saman, ef við höfum skýra sýn á það hverju þarf að breyta ... getum við verið uppbyggileg stjórnarandstaða og við getum verið sú góða ríkisstjórn sem þetta land sárlega vantar," sagði hann.

Keppinautur hans um leiðtogasætið, David Davis, fékk innan við þriðjung atkvæða í póstkosningunni sem fram fór meðal 250.000 almennra félagsmanna í flokknum. Hann tók ósigrinum með ró og lýsti Cameron tilvonandi forsætisráðherra.

Verkefnið sem bíður Camerons er að reyna að endurheimta fyrri sess Íhaldsflokksins, sem hélt um stjórnartaumana í Bretlandi megnið af 20. öldinni. Margir álíta flokkinn hafa staðnað og ekki fylgt þeim breytingum sem orðið hafa á bresku þjóðfélagi. Stjórnmálaskýrendur telja nokkra áhættu í því fólgna fyrir flokkinn að velja Cameron til forystu í von um að hann sé fær um að breikka fylgi flokksins. Forréttindauppeldi hans í vel þénandi menntamannafjölskyldu og menntun í Eton og Oxford þykja síður til þess fallin að höfða til alþýðunnar.

Eiginkona hans er af aðalsættum. Sem stjórnmálamaður hefur hann hins vegar sýnt að hann kann lagið á að tala til fólks og pólitískar áherslur hans þykja miðjusæknar.

"Við verðum að breytast til að fólk geti treyst okkur," sagði hann um eigin flokk. Til dæmis væri það forgangsmál að fjölga konum í honum.