Engin klipping því Manchester United gerði jafn­tefli

Mark frá Benjamin Sesko undir lok leiks tryggði Manchester United dramatískt jafntefli á útivelli gegn fallbaráttuliði West Ham í ensku úrvalsdeildinni í kvöld. Lokatölur 1-1.

Fyrir leik kvöldsins hafði Manchester United verið á miklu flugi undir stjórn Michael Carrick og unnið fjóra leiki í röð. Margir biðu í ofvæni eftir því hvort fimmti sigurleikurinn í röð kæmi í kvöld, enginn þó eins mikið og stuðningsmaður Manchester United, Frank Ilett, sem hafði ekki farið í klippingu í 493 daga, eða frá því að hann hét því að fara ekki í klippingu fyrr en sitt lið ynni fimm leiki í röð. 

Vonir Franks urðu nær að engu þegar að Tomas Soucek kom West Ham United yfir með marki á 50.mínútu leiksins. Staðan orðin 1-0.

Casemiro kom boltanum í netið fyrir Manchester United á 63.mínútu og héldu margir að jöfnunarmarkið væri þar komið en markið fékk ekki að standa þar sem Casemiro var dæmdur rangstæður. 

Það leit allt út fyrir að heimamenn í West Ham væru að sigla heim mikilvægum sigri en þegar komið var fram í uppbótartíma tókst Benjamin Sesko að koma boltanum í netið fyrir Manchester United og sækja stig fyrir Rauðu djöflana í leik sem endaði með 1-1 jafntefli. 

Jafnteflið gerir það að verkum að West Ham United er áfram í fallsæti með 24 stig. Manchester United er í 4.sæti með 45 stig. Fran Ilett, stuðningsmaður Manchester United er ekki á leið í klippingu, liðinu hans tókst ekki að vinna fimm leiki í röð.