Vantrauststillaga felld

Vantrauststillaga á hendur Dominique de Villepin, forsætisráðherra Frakklands, var felld í neðri deild franska þingsins í gær. Tillagan var lögð fram af sósíalistum vegna ásakana á hendur ráðherranum um óheiðarleg vinnubrögð í kosningabaráttu.

Alræmds plastblómasala leitað

Lögregla á Suðvesturlandi leitar nú að alræmdum plastblómasala af erlendu bergi brotinn, eftir að hann steig á vítalínuna í gær með því að stela fimm þúsund krónum frá konu, sem býr á sambýli aldraðra í Keflavík.

Reikult ökulag vakti athygli

Reikult ökulag á fólksbíl, vakti athygli lögreglunnar í Keflavík í gærkvöldi og stöðvaði hún ökumanninn. Kom þá í ljós að hann reyndist í meira lagi drukkinn.

Blóðug mótmæli í Kólumbíu

Að minnsta kosti einn lést í fjölmennum mótmælum sem brutust út í þorpinu Piendamo í Kólumbíu í gær. Að sögn forvígismanna mótmælanna voru þau tilkomin vegna nýs fríverslunarsamnings kólumbískra yfirvalda við Bandaríkin og væntanlegt endurkjör forseta Kólumbíu, Alvaro Uribe, í kosningum síðar í mánuðinum.

Fimm látnir af völdum fuglaflensu

Sex tilfelli fuglaflensu hafa greinst í mönnum á Indónesíu síðustu daga. Fimm þeirra sem greindust eru nú látnir. Alþjóða heilbrigðismálastofnunin staðfesti þetta í morgun.

Eldur í sumarbústað

Sumarbústaður við Hreðavatn, skammt frá Bifröst, stórskemmdist í eldi seint í gærkvöldi. Bústaðurinn var mannlaus þegar eldurinn kom upp.

Fellibylur stefnir á Hong Kong

Fellibylurinn Chanchu stefnir nú hraðbyri að Hong Kong og suðurströnd Kína. Ekki er þó víst að hann skelli á Hong Kong og jafnvel líkur á að hann fari framhjá síðar í dag. Víst er þó talið að hann valdi usla í Guangdong-héraði í fyrramálið.

Ráðherra fellur í sjálfsmorðsárás

Sjö hið minnsta biðu bana í sjálfsmorðsárás á bílalest í Ingusétíu-héraði í Suður-Rússlandi í morgun.

Viðbrögð við flóðbylgju æfð

Rúmlega 30 ríki við Kyrrahaf tóku þátt í æfingu sem fram fór í morgun á viðbrögðum við hugsanlegum jarðskjálfta og flóðbylgju í heimshlutanum. Að sögn stjórnenda æfingarinnar tókst hún vel.

Tveir í gæsluvarðhald vegna árásar

Tveir menn hafa verið úrskurðaðir í gæsluvarðhald til 30. maí vegna gruns um frelsissviptingu og alvarlega líkamárás í Heiðmörk um helgina. Dómarinn frestaði úrskurði um gæsluvarðhald yfir þriðja manninum til kl. 11 í dag.

Segir ríkið stærsta lífeyrisþegann

Húsfyllir var í Háskólabíói þegar Þjóðfundur um þjóðarátak í málum aldraðra var haldinn. Á fundinn höfðu fulltrúar allrar stjórnmálaflokka verið boðaðir og vakti athygli að allir nema Steingrímur J. Sigfússon virtust sammála um að það bæri að flytja málefni eldri borgara Íslendinga frá ríki til sveitarfélaga.

Umhverfisráðherra jákvæður í garð friðunar Langasjós

Umhverfisráðherra segir vel koma til greina að Langisjór verði friðaður og að hann komi hugsanlega inn í stækkaðan Vatnajökulsþjóðgarð í framtíðinni. Landsvirkjun hefur sýnt stöðuvatninu áhuga með það fyrir augum að veita hluta Skaftár þar í gegn.

Vetnisbílar á almennan markað eftir 4 til 8 ár

Vetnisknúnir fólksbílar geta farið í fjöldaframleiðslu og á almennan markað eftir fjögur til átta ár. Bandaríski bílaframleiðandinn General Motors er nú í kynningarferð hér á landi með hóp erlendra blaðamanna til að kynna þróun vetnistækninnar.

Vantrausttillaga á de Villepin felld

Vantrauststillaga á hendur Dominique de Villepin, forsætisráðherra Frakklands var felld í neðri deild franska þingsins í dag. Tillagan var lögð fram af sósíalistum vegna ásakana á hendur Villepin um óheiðarleg vinnubrögð í kosningabaráttu. Ekki var mikil hætta á að vantrauststillagan yrði samþykkt, enda hefur ríkisstjórn Villepins rúma meirihluta í neðri deildinni: 364 af 577 þingsætum.

Tveir menn í gæsluvarðhaldi vegna árásar í Heiðmörk

Tveir menn hafa verið úrskurðaðir í gæsluvarðhald til 30. maí vegna gruns um frelsissviptingu og alvarlega líkamárás í Heiðmörk um helgina. Dómarinn frestaði úrskurði um gæsluvarðhald yfir þriðja manninum til klukkan ellefu í fyrramálið. Lögreglan í Kópavogi óskaði í dag í Héraðsdómi Reykjaness eftir gæsluvarðhaldi yfir þremur ungum mönnum sem grunaðir eru um líkamsárás og mannrán í Garðabæ á laugardagskvöld.

Ætla ekki að starfa við spítalann

Heill árgangur hjúkrunarfræðinga, sem útskrifast í vor, ætlar ekki að hefja störf á Landspítalanum nema laun verði hækkuð. Landspítalinn á í samningaviðræðum við erlendar starfsmannaleigur til þess að ráða bót á manneklunni á spítalanum.

Umferðarstofa til fyrirmyndar

Umferðarstofu var í dag veitt viðurkenning fyrir að vera fyrirmyndar ríkisstofnun ársins 2006. Tilgangur þessara verðlauna er að hvetja stofnannir til dáða í að bæta þjónustu, hagkvæmni, skilvirkni og árangur í ríkisrekstri.

Dæmdur í 12 mánaða fangelsi fyrir nauðgun

Héraðsdómur Reykjaness hefur dæmt rúmlega tvítugan karlmann í 12 mánaða fangelsi fyrir kynferðisbrot með því að hafa í júní í fyrra haft samræði við konu sem ekki gat spornað gegn verknaðinum vegna svefndrunga og ölvunar. Þá er hann dæmdur til að greiða konunni 500 þúsund krónur í miskabætur sem og sakar- málskostnað upp á tæpar 7 hundruð þúsund krónur.

Aðalskipulag Seltjarnarness staðfest

Nýtt aðalskipulag Seltjarnarnessbæjar var staðfest og undirritað í dag af Sigríði Önnu Þórðardóttur umhverfisráðherra. Með staðfestingunni er lokið viðamiklu skipulagsferli, sem hófst árið 2002, lokið.

Vara við vaxtahækkunum

Samtök atvinnulífsins lýsa yfir áhyggjum sínum af hugsanlegri vaxtahækkun Seðlabankans nú næstu daga í því skyni að vinna gegn hækkunum á verðlagi í landinu. Í bréfi til bankastjórnar Seðlabankans lýsa samtökin verulegum efasemdum um að vaxtahækkun nú muni skila tilætluðum árangri. Allt eins megi reikna með því að vaxtahækkun þyki ótrúverðug vegna þess hve vextir eru háir fyrir og vegna þess að gengið lækkaði þrátt fyrir þessa háu vexti. Þá benda SA á líkur á efnahagssamdrætti á næsta ári og telja vaxtahækkun því vafasama. SA hvetja því Seðlabankann til að halda að sér höndum með vaxtahækkun.

Deilt um hugmyndir um gjaldskyldu

Samfylkingin boðar gjaldskyldu fyrir bílastæði við leik- og grunnskóla, framhaldsskóla og háskóla í Reykjavík á næsta kjörtímabili. Þetta kemur fram í fréttatilkynningu frá borgarstjórn Sjálfstæðisflokksins og sagt að þessar hugmyndir séu komnar í framkvæmdaáætlun um samgöngustefnu. Í fréttatilkynningunni var því einnig lýst yfir að Sjálfstæðismenn séu algerlega andvígir slíkri gjaldtöku.

Treyja Ronaldinhos seldist á rúmlega milljón

Rúmlega ein milljón króna safnaðist í uppboði á treyju Ronaldinhos, fótboltakappa í Barcelona, á vegum Glitnis. Uppboðið var til styrktar Barnahjálpar Sameinuðu þjóðanna og fór fram á sjávarútvegssýningunni í Brussel.

Leitað á ákveðnum svæðum

Dregið hefur verið úr umfangi leitarinnar að Pétri Þorvarðarsyni sem ekkert hefur spurst til síðan aðfaranótt sunnudags. Byrjað er að kalla björgunarsveitarmenn heim en leit verður haldið áfram á ákveðnum svæðum.

Lögregla óskar eftir gæsluvarðhaldi

Lögreglan í Kópavogi óskaði í dag í Héraðsdómi Reykjaness eftir gæsluvarðhaldi yfir þremur ungum mönnum sem grunaðir eru um líkamsárás og mannrán í Garðabæ á laugardagskvöld. Héraðsdómari er þessa stundina að taka afstöðu til gæsluvarðhaldskröfu lögreglunnar. Þeir grunuðu gáfu sig allir fram við lögregluna í Kópavogi í dag. Sá fyrsti ffyrir hádegi. Lögreglan hafði símasamband við hina tvo sem síðan gáfu sig fram í sitthvoru lagi, annar um hádegið og hinn um klukkan tvö. Mennirnir hafa verið í yfirheyrslu hjá lögreglunni í dag. En þeir eru runaðir um að hafa numið mann á brott af heimili hans í Garðabæ á laugardagskvöld, ekið með hann upp í Heiðmörk og gengið í skrokk á honum. Allir hinir grunuðu eru innan við tvítugt og hafa allir komið við sögu lögreglunnar áður. Sá sem fyrir árásinni varð, liggur á sjúkrahúsi og mun ekki enn vera úr allri lífshættu.

Dregið úr umfangi leitarinnar

Byrjað er að kalla þá björgunarsveitarmenn heim sem hafa leitað að Pétri Þorvarðarsyni sem hvarf á Grímsstöðum á Fjöllum aðfaranótt laugardags. Mikill fjöldi björgunarsveitarmanna hefur verið við leit en nú verður dregið verulega úr umfangi leitarinnar.

Rúmlega þúsund söfnuðust við Stóriðjulausum Vestfjörðum

Um það bil ellefu hundrað undirskriftir söfnuðust við stuðningsyfirlýsingu um stóriðjulausa Vestfirði á sýningunni Perlan Vestfirðir, sem haldin var fyrstu helgi þessa mánaðar.

Allir í haldi lögreglunnar

Þriðji maðurinn sem grunaður er um líkamsárás í Heiðmörk um helgina er nú í haldi lögreglunnar í Kópavogi. Hann gaf sig fram nú fyrir stundu. Hinir tveir gáfu sig fram fyrr í dag.

Gorbatsjof vinsæll

Um fimm hundruð miðar hafa selst á fyrirlestur Mikhail Gorbatsjofs, síðasta leiðtoga Sovétríkjanna, sem kemur til landsins í október en þá verða tuttugu liðin frá leiðtogafundi hans og Ronald Reagans, Bandaríkjaforseta, í Höfða.

Tveir árásarmannanna í gæsluvarðhaldi

Tveir menn eru í haldi lögreglunnar í Kópavogi vegna gruns um að hafa tekið þátt í líkamsárás ásamt einum til viðbótar á laugardagskvöldið. Samkvæmt upplýsingum frá lögreglunni í Kópavogi er búist við því að þriðji maðurinn gefi sig fram nú um tvö leytið.

Stjórnvöld hafa ekki sinnt málefnum aldraðra

Samtök eldri borgara boða til þjóðfundar um málefni sín í Háskólabíói í kvöld. Stefán Ólafsson, prófessor, mun birta niðurstöður rannsóknar sem sýnir að eldri borgarar hafa dregist aftur úr í kjörum og einnig verður gerður samanburður við kjör eldri borgara á Norðurlöndunum.

Sjálfstæðisflokkur og Vinstri grænir í sókn á Akranesi

Sjálfstæðisflokkurinn og Vinstri grænir eru í verulegri sókn á Akranesi en fylgi við Samfylkinguna minnkar frá síðustu kosningum og Framsóknarflokkur tapar helmingi fyrra fylgis síns, samkvæmt nýrri skoðanakönnun Fréttablaðsins.

Þjóðmálafundur NFS í Hafnarfirði í kvöld

Sjöundi þjóðmálafundur NFS í beinni útsendingu, vegna komandi sveitarstjórnarkosninga, verður haldinn í Hafnarfirði í kvöld. Þar er Samfylkingin með hreinan meirihluta eftir síðustu kosningar, en kl. 17 í dag birtum við fyrstu niðurstöður nýrrar skoðanakönnunar Félagsvísindastofnunar, sem sýnir hvort breyting er að verða á því.

Viðbúnaður við Sundahöfn

Lögregla og kafarar eru nú við störf í Sundahöfn í Reykjavík. Um er að ræða eftirgrennslan eftir manni en bíll hans fannst á svæðinu í dag. Ekki er talið að um saknæmt athæfi sé að ræða.

Eimskip kaupir í bresku fyrirtæki

Eimskip hefur gengið frá kaupum á 55% hlut í breska fyrirtækinu Innovate, sem sérhæfir sig í geymslu og dreifingu á kældum og frystum afurðum. Kaupverð er trúnaðarmál. Í tilkynningu Eimskips segir að með kaupunum á hollenska frystigeymslufyrirtækinu Daalimpex fyrr á árinu og Innovate nú sé Eimskip orðið ráðandi aðili í Evrópu þegar kemur að geymslu á hitastýrðum matvælum.

Lítið upp í skaðann af virkjun

Tuttugu milljóna króna styrkur Alcoa vegna þjóðgarða vegur lítið til móts við þann skaða sem verður af Kárahnjúkavirkjun segir formaður Náttúruverndarsamtaka Íslands. Hann telur styrkinn frekar til marks um sýndarmennsku en að fyrirtækið standi sig vel í umhverfismálum.

Viðráðanlegt ójafnvægi

Vaxandi ójafnvægi í íslenska hagkerfinu er áhyggjuefni. Efnahagshorfur eru þó góðar og ríkisstjórnin ætti að vera í stakk búin að takast á við sveiflur í efnahagsmálum að mati Alþjóðagjaldeyrissjóðsins.

Segist iðrast gjörða sinna

Eyþór Arnalds segir áhugann á stjórnmálum sinn óbreyttann en framtíðin muni skera út um pólistískan frama hans. Hann segist iðrast gjörða sinna sem hann segir óafsakanlegar.

ESSO lækkar bensínverðið

ESSO lækkar verðið á bensínlítranum um eina krónu í dag og er algengt verð í sjálfsafgreiðslu 124,40 krónur. Lítrinn af dísilolíu og gasi lækkar einnig um eina krónu.

Leit stendur enn

Leit stendur enn að Pétri Þorvarðarsyni, sem fór fótgangandi frá Grímsstöðum á Fjöllum aðfaranótt sunnudags. Búið er að leita vandlega á 500 ferkílómetra landsvæði án þess að nokkur vísbending hafi fundist um ferðir Péturs.

Óflughæfar nær fimmta hvern dag frá áramótum

Þyrlur Landhelgisgæslunnar hafa verið óflughæfar samtímis nær fimmta hvern dag frá áramótum. Þá daga hefur þurft að treysta alfarið á aðstoð frá Varnarliðinu á Keflavíkurflugvelli eða danska varðskipinu Triton ef þyrlu hefur þurft til björgunarstarfa.

Áfengisverslun sprengd í Bagdad

Áfengisverslun var sprengd í Bagdad, höfuðborg Íraks, í morgun. Sprengju var komið fyrir við dyr verslunarinnar og var þetta í þriðja sinn sem hún var skotmark öfgamanna.

Milljóna samningur um boranir

Jarðboranir hafa gert samning við orkufyrirtæki á Asoreyjum, sem tilheyra Portúgal, um borun á rannsókna- og vinnsluholum, til undirbúnings háhitavirkjunar á eyjunum. Samningurinn er upp á 500 til 700 milljónir króna og er sá stærsti sem Jarðboranir hafa gert í útlöndum.

Dæmt vegna ódæðana í Beslan

Allt stefnir í að eini eftirlifandi maðurinn sem átti aðild að hryðjuverkaárásinni á barnaskóla í Beslan fyrir um einu og hálfu ári verði sakfelldur. Hryðjuverkamenn hertóku skólann og héldu honum í þrjá daga, þar til hersveitir réðust á skólann og frelsuðu gíslana. 330 féllu í skotbardaganum sem fylgdi, meirihluti þeirra börn.

Fjórðungur Skagamanna nýtir sér strætó

Rúmlega fjóðrungur Skagamanna hefur nýtt sér þjónustu Strætó á milli Akraness og Reykjavíkur, sem líklega er talsvert hærra hlutfall en á höfuðborgarsvæðinu sjálfu.

Sinueldar í skógræktarsvæði

Slökkvilið Brunavarna Suðurnesja og lögreglan börðust í gær við þó nokkurn sinueld á skógræktarsvæði við Rósaselstjarnir ofan við byggðina í Keflavík. Varðeldur hafði verið kveiktur í skógræktinni og af ummerkjum að ráða hafði verið gerð tilraun til að poppa poppkorn á eldinum sem síðan barst í skógræktina. Nokkuð af trjám varð eldinum að bráð og einnig logaði glatt í sinu og mosa á svæðinu.