Upp­gjörið: FH - Valur 2-0 | Gils gerði gæfu­muninn í langþráðum sigri FH-liðsins

FH vann langþráðan sigur, 2-0 þegar liðið fékk Val í heimsókn á Kaplakrikavöll í Hafnarfirði í 14. umferð Bestu-deildar karla í fótbolta í kvöld. Gils Gíslason kom inná sem varamaður hjá FH og reyndist hetja liðsins. 

Liðin skiptust á að hafa yfirhöndina í fyrri hálfleik og fengu bæði fín færi til þess að brjóta ísinn.

Róbert Hugi Sævarsson og Tómas Orri Róbertsson komust báðir í góð skotfæri og Ágúst Úlfur Björnsson reyndi á Frederik Schram tvívegis með föstum og hnitmiðuðum sköllum sínum.

Tryggvi Hrafn Haraldsson setti boltann í netið um miðjan fyrri hálfleik en var réttilega flaggaður rangstæður og markið stóð þar af leiðandi ekki. Albin Skoglund setti boltann svo í þverslána með skoti sínu af stuttu færi eftir hárnákvæma sendingu Tryggva Hrafns.

Inn vildi boltinn hins vegar ekki og staðan markalaus þegar liðin röltu til búningsklefa í haustveðrinu í firðinum fagra.

Valsmenn skiptu úr leikkerfinu 3-4-3 í 4-3-3 í hálflleik og við það batnaði sóknarleikur gestanna töluvert. Valsmenn náðu að koma Lúkasi Loga og Jónatani Inga meira í spilið og urðu hættulegri í sóknaraðgerðum sínum.

Ólafur Flóki Stephensen fékk tvo góð færi til þess að ná forystunni fyrir Val og Lúkas Logi og Jónatan Ingi voru sömuleiðs aðgangsharðir upp við mark heimamanna.

Ingimar Torbjörnsson Stöle setti svo Albin Skoglund í frábært færi um miðjan seinni hálfleikinn en Jökull Andrésson sá til þess að staðan var enn markalaus með frábærri markvörslu sinni.

FH gerði fjórar skiptingar um miðbik seinni hálfleiks sem blésu lífi í spilamennsku FH. Einn af þeim sem kom inná hjá FH-ingum var Gils Gíslason sem skoraði sigurmark heimamanna þegar um það bil 10 mínútur voru eftir af leiknum.

Gils nýtti sér þá mistök Ingimars Stöle og chippaði boltanum svo smekklega yfir Frederik Schram. Virkilega vel gert hjá þessum hraða og skemmtilega kantmanni sem kom sterkur inn af bekknum.

Til þess að fullkomna góða innkoma sínu gulltryggði Gils svo langþráðan sigur FH-liðins með marki sínu skömmu fyrir leikslok. Gils nýtti þá hraða sinn og kraft og setti boltann huggulega í fjærhornið. Gils var svo hársbreidd frá því að fullkomna þrennu sína í uppbótartíma leiksins.

FH hefur nú spilað fimm deildarleik í röð án þess að bíða lægri hlut en liðið vann Keflavík um miðjan júnímánuð og gerði svo jafntefli við Þór, ÍBV og Stjörnuna. 

FH situr í næstneðsta sæti deildarinnar með 11 stig og er tveimur stigum á eftir KA sem er í næsta sæti fyrir ofan fallsvæðið. Valur er aftur á móti í fimmta sæti með 19 stig og siglir lygnan sjó um miðja deild eins og sakir standa. 

Jóhannes Karl: Fengum ferska fætur með skiptingunum

„Frammistaðan í þessum leik var bara heilt yfir nokkuð góð. Við vorum flottir í fyrri hálfleik og fengum nokkur færi til þess að skora tvö til þrjú mörk. Valsmenn komu sterkir inn í seinni hálfleik og náðu yfirhöndinni en við náðum svo vopnum okkar aftur og sigldum sigrinum heim,“ sagði Jóhannes Karl Guðjónsson, þjálfari FH, að leik loknum.

„Það sem gleður mig mest er að við höldum áfram að pressa á réttum mómentum og vorum hugrakkir í spilinu þegar það átti við. Bæði í fyrri hálfleik og svo aftur eftir að Valur náði tökum á leiknum í upphafi seinni hálfleiks,“ sagði Jóhannes Karl enn fremur. 

„Við fáum tvö dauðafæri áður en við skorum mörkin tvö sem Gils gerir vel í. Við fengum ferskar lappir inn á völlinn með skiptingunum. Þeir sem komu inná í dag voru gjörsamlega frábærir og hjálpuðu okkur að ná í sigurinn. Það er góður andi í leikmannahópnum þrátt fyrir rýra stigasöfnun. Það sást í dag hvað við erum með stóran, flottan og þéttan hóp,“ sagði hann stoltur um leikmenn sína. 

„Strákarnir eiga hrós skilið fyrir vinnusemi, samheldni og spilamennskuna. Sem dæmi um það er varnarleikurinn hjá Gils sem hjálpaði Baldri Kára á varnarhelmingnum auk þess að skora tvö góð mörk. Við sýndum allir karakter og brugðumst vel við alls konar aðstæðum í þessum leik sem sýnir liðsheildina sem er í hópnum,“ sagði Jóhannes Karl.

Chris: Leikmenn mínir lögðu allt í leikinn 

„Við erum svekktir með þessa niðurstöðu. Mér finnst strákarnir eiga meira skilið miðað við hvað þeir lögðu í leikinn og hvernig frammistaðan var. Hugarfarið var gott í fyrri hálfleik og spilamennskan í fyrri hluta seinni hálfleiks var mjög góð að mínu mati,“ sagði Chris Brazell, þjálfari Vals, vonsvikinn eftir leik. 

„FH gerði vel í að auka orkustigið þegar leið á seinni hálfleikinn og við áttum í erfiðleikum með að ráða við kraftinn í þeim undir lokin. Þeir refsuðu okkur með hraða sínum og krafti og eiga hrós skilið fyrir það,“ sagði Chris þar að auki. 

„Mér fannst þessi leikur sýna að við séum að þróast í rétta átt. Eins og staðan er núna þá er tilfinningin eins og það sé allt á móti okkur, sem er að sjálfsögðu ekki rétt. Við ráðum auðvitað okkur eigin örlögum sjálfir,“ sagði hann. 

„Hafandi sagt það þá er fullt af jákvæðum hlutum sem við getum tekið út úr þessum leik. Við spiluðum góðan fótbolta en náðum ekki að nýta stöðurnar og færin þegar á hólminn er komið. Það virðist vera lítið sjálfstraust í liðinu eins og staðan er núna en við munum vinna okkur út úr þessu,“ sagði Chris upplitsdjarfur þrátt fyrir tapið. 

Atvik leiksins

Eins og áður segir breyttu skiptingarnar sem Jóhannes Karl gerði í seinni hálfleik gangi leiksins. Valsmenn virtust vera að fara að setja stigin í pokann góða en varamennirnir færðu FH kraft, ákefð og sóknarþunga sem varð lykillinn að sigrinum. 

Stjörnur og skúrkar

Kollegarnir Jökull Andrésson og Frederik Schram stóðu sig svo sannarlega í stykkinu í rammanum hjá liðinum og í raun var ótrúlegt að staðan var markalaus þegar sirka 80 mínútur voru liðnar af leiknum. 

Tómas Orri átti flottan dag á miðsvæðinu hjá FH og Kjartan Kári var síógnandi á kantinum. Innkoma Gils á vænginn hjá FH skipti sköpum og Kristján Flóki Finnbogason og Arnór Borg Guðjohnsen hresstu sömuleiðis mikið upp á sóknarleik heimamanna með innkomum sínum. 

Jónatan Ingi Jónsson naut sín vel á sínum gamla heimavelli og sýndi frábær tilþrif. Jónatan Ingi og Lúkas Logi tengdu vel saman í upphafi seinni hálfleiks. Tryggi Hrafn var flottur í fyrri hálfleik en sást ekki jafn mikið í þeim seinni. 

Dómarar leiksins

Dómarar leiksins, þeir Jóhann Ingi Jónsson, Ragnar Þór Bender, Guðmundur Ingi Bjarnason og Pétur Guðmundsson, gerðu allt sem í þeirra valdi stóð til þess að láta leikinn flæða án sinnar truflunar og auka þannig skemmtanagildið. Það tókst vel upp og þeir félagar fá sjö í einkunn fyrir vel unninn störf. 

Stemming og umgjörð

Fínasta mæting í nepjunni í Kaplakrika og hvatningarópin glumdu um Krikann. Gaman að sjá grænan og fallegan Kaplakrikavöll sem skartar sínu fegursta þessa stundina. Þó svo að gervigrasið sé vissulega framtíðin þá er ekkert sem toppar fótboltaleik sem leikinn er í rigningarúða á náttúrulegu grasi.