Kallar eftir þjónustu: „Hver er annars til­gangurinn?“

Engan stuðningsmann Liverpool þarf að kynna fyrir Robbie Fowler, sem er gjarnan kallaður Guð í Bítlaborginni. Hann skoraði 183 mörk fyrir félagið milli 1993 og 2002 og aftur milli 2005 og 2007. Hann þekkir að klæðast treyju númer níu hjá félaginu sem hefur virst þung á herðum Alexanders Isak sem hefur ekki átt sjö dagana sæla eftir komu fyrir metfé frá Newcastle.

„Hann hefur átt í erfiðleikum í ár hvað varðar form og fótbrotið. Hann hefur ekki sýnt samskonar frammistöðu og hjá Newcastle,“ segir Fowler í samtali við Sýn Sport og Vísi.

„En það er enginn vafi á því að hann er úrvalsleikmaður. Það má segja að verðið sem Liverpool greiddi fyrir hann hafi ekki verið honum til framdráttar,“

„En leikmaðurinn ákveður ekki verðið heldur félögin. Það getur í raun haft áhrif á frammistöðu leikmannsins. En ég myndi ráðleggja honum að gleyma tölunum og vera sá leikmaður sem við sáum leika með Newcastle,“ segir Fowler.

Framherjar þurfa þjónustu

Hann telur að Isak þurfi að stíga upp í fjarveru Hugo Ekitiké sem verður frá langt fram á næstu leiktíð vegna hásinarslita. Þeir Isak og Ekitiké hafi hins vegar ekki fengið þá þjónustu sem þeir eigi skilið frá skapandi leikmönnum liðsins.

„Það er mikilvægt að fá leikmenn í kringum framherjana svo menn fái þau tækifæri sem þeir þarf. Hver er annars tilgangurinn með því að semja við þá?“

„Hvers vegna að verja stórfé í þá ef þeir fá ekki boltann inn í teiginn? Framherjar skora ekki mörk nema þeir fái þjónustu frá öðrum leikmönnum. Ef þeir fá það ekki er lítið á því að græða,“ segir Fowler.

Telur að Liverpool lendi í þriðja sæti

Liverpool hefur átt erfitt ár og óhætt að segja að titilvörn liðsins hafi ekki gengið vel. Töluverð pressa er á Arne Slot, þjálfara liðsins, sem verður að ná Meistaradeildarsæti í vor.

Nú er markmiðið að ná Meistaradeildarsæti. Ertu bjartsýnn á að liðið nái því markmiði?

„Ég er hóflega bjartsýnn. Kannski er ég að setja mig á háan hest, en form liðsins undanfarið hefur ekki verið upp á sitt besta. Það sem Liverpool þarf, og það sem skiptir máli svo þeir nái sínu besta og hefur sannast í áranna rás er að þeir eiga að ná úrslitum í samræmi við getu liðsins,“

„Ég tel að þeir muni ná þeim úrslitum. Ég tel að þeir hafni í þriðja sæti,“ segir Fowler.

Töluvert lengra viðtal var tekið við Fowler sem má sjá í heild sinni í spilaranum að neðan.

Einnig má hlusta á það í Tal-spilaranum að ofan sem og á öllum helstu hlaðvarpsveitum í þættinum Besta sætið.