Shearer segir að leik­menn Newcastle hafi fleygt Howe undir rútuna

Newcastle tapaði 1-2 fyrir Bournemouth á laugardaginn og er í 14. sæti ensku úrvalsdeildarinnar.

Vonbrigði Newcastle-manna eru mikil en á síðasta tímabili unnu þeir deildabikarinn og komust í Meistaradeild Evrópu. Howe þykir vera orðinn valtur í sessi og Shearer finnst ólíklegt að hann verði stjóri Newcastle þegar næsta tímabil gengur í garð.

„Eins erfitt og þetta er fyrir Eddie veit ég ekki hvað gerist með hann. Ég horfði á viðtalið við hann eftir leikinn og horfði á hann á hliðarlínunni og hugsaði: Vill hann halda áfram? Fær hann tækifæri til þess?“ sagði Shearer í hlaðvarpinu The Rest is Football.

„Ég sé Eddie Howe því miður ekki í starfi hjá Newcastle á næsta tímabili. Ég horfði á viðtalið og er ekki viss um að baráttuandinn sé til staðar.“

Shearer segir að sökin á slæmu gengi Newcastle liggi hjá leikmönnum liðsins.

„Ég horfði á leikmennina og ef þetta er það sem þeir kalla að berjast fyrir stjórann voru þeir hræðilegir. Þeir fleygðu honum undir rútuna,“ sagði Shearer.

Howe hefur stýrt Newcastle frá því í nóvember 2021. Hann hefur tvisvar sinnum komið liðinu í Meistaradeildina og í fyrra vann hann fyrsta stóra titil Newcastle í 56 ár.